سکھر: گڈو بیراج پر درمیانے درجے کا سیلاب، سکھر بیراج پر نچلے درجے کا سیلاب برقرار

سکھر(بیورورپورٹ)دریائے سندھ میں پانی کے بہاؤ میں مسلسل اضافے کے باعث گڈو بیراج پر درمیانے درجے کا سیلاب (Medium Flood) ڈکلیئر کر دیا گیا ہے، جبکہ سکھر بیراج پر نچلے درجے کا سیلاب (Low Flood) بدستور برقرار ہے۔ محکمہ آبپاشی نے دریائے سندھ کی صورتحال پر مسلسل نظر رکھنے اور نشیبی و کچے علاقوں کے مکینوں کو احتیاطی تدابیر اختیار کرنے کی ہدایت جاری کر دی ہے۔محکمہ آبپاشی کی جانب سے جاری کردہ تازہ اعداد و شمار کے مطابق گڈو بیراج پر پانی کی بالائی آمد 412,682 کیوسک جبکہ اخراج 373,467 کیوسک ریکارڈ کیا گیا، جس کے بعد وہاں درمیانے درجے کا سیلاب باضابطہ طور پر ڈکلیئر کر دیا گیا ہے۔دوسری جانب سکھر بیراج پر پانی کی بالائی آمد 290,060 کیوسک اور اخراج 233,230 کیوسک ریکارڈ کیا گیا ہے۔ حکام کے مطابق سکھر بیراج پر اس وقت نچلے درجے کا سیلاب برقرار ہے اور صورتحال پر مسلسل نظر رکھی جا رہی ہے۔ادھر کوٹری بیراج پر پانی کی آمد 51,965 کیوسک جبکہ اخراج 8,260 کیوسک ریکارڈ کیا گیا ہے۔ محکمہ آبپاشی کے مطابق دریائے سندھ میں پانی کے بہاؤ میں مسلسل تبدیلی کو مانیٹر کیا جا رہا ہے تاکہ کسی بھی ہنگامی صورتحال سے بروقت نمٹا جا سکے۔محکمہ آبپاشی نے دریائے سندھ کے کناروں، کچے علاقوں اور نشیبی مقامات پر رہائش پذیر افراد کو خبردار کرتے ہوئے کہا ہے کہ وہ غیر ضروری طور پر دریا کے قریب جانے سے گریز کریں، مقامی انتظامیہ کی ہدایات پر عمل کریں اور کسی بھی ہنگامی صورتحال کی صورت میں فوری طور پر متعلقہ اداروں سے رابطہ کریں۔