سکھر: مبینہ طور پر گھر پر قبضہ، راستہ بند کرنے اور پولیس کی عدم کارروائی کے خلاف کلہوڑو برادری کا احتجاج

سکھر(بیورورپورٹ)سکھر کے تعلقہ پنوعاقل کے گاؤں باغ پئی کے رہائشی کلہوڑو برادری کے افراد نے مبینہ طور پر گھر پر قبضہ، راستہ بند کرنے اور پولیس کی عدم کارروائی کے خلاف سکھر پریس کلب کے سامنے احتجاج کرتے ہوئے انصاف اور تحفظ کا مطالبہ کیا۔احتجاج میں عبدالغفار کلہوڑو، ان کی اہلیہ مائی جاویداں کلہوڑو، معصوم بچوں اور بیٹوں نصیب اللہ اور نجیب اللہ کلہوڑو نے شرکت کی۔ اس موقع پر متاثرین نے میڈیا سے گفتگو کرتے ہوئے الزام عائد کیا کہ عجیب کلہوڑو اپنے ساتھیوں کے ہمراہ ان کے گھر پر ناجائز قبضہ کر چکا ہے، جبکہ نالیاں پُر کرکے آمدورفت کا واحد راستہ بھی بند کر دیا گیا ہے، جس کے باعث انہیں شدید مشکلات کا سامنا ہے۔متاثرین کا کہنا تھا کہ انہوں نے اس معاملے پر متعدد بار پولیس کو درخواستیں دیں، مگر تاحال کوئی مؤثر کارروائی عمل میں نہیں لائی گئی۔ ان کے مطابق پولیس کی بے حسی اور مبینہ جانبداری کے باعث ان کی جان و مال کو شدید خطرات لاحق ہو گئے ہیں۔انہوں نے مزید الزام لگایا کہ متعلقہ تھانے کے ایس ایچ او سانگی مبینہ طور پر ملزم فریق کی سرپرستی کر رہے ہیں، جس کی وجہ سے بااثر ملزمان انہیں دھمکیاں دے رہے ہیں اور کسی بھی وقت نقصان پہنچا سکتے ہیں۔احتجاج کرنے والوں نے آئی جی سندھ، ڈی آئی جی سکھر، ایس ایس پی سکھر، ڈپٹی کمشنر سکھر اور دیگر متعلقہ حکام سے مطالبہ کیا کہ واقعے کا فوری نوٹس لے کر ملزموں کے خلاف قانونی کارروائی کی جائے، ناجائز قبضہ ختم کرایا جائے اور متاثرہ خاندان کو انصاف کے ساتھ مکمل تحفظ فراہم کیا جائے۔