جرائم کے خاتمے اور عوام کا تحفظ اولین ترجیح ہے، تاجر برادری کا تعاون قابلِ قدر ہے: ایس ایس پی سکھر اظہر خان مغل

سکھر(بیورورپورٹ)ایس ایس پی سکھر اظہر خان مغل نے کہا ہے کہ ضلع بھر میں امن و امان کے قیام، جرائم پیشہ عناصر کی سرکوبی، سماجی برائیوں کے خاتمہ کے لئے موثر اقدامات کئے گئے ہیں، پولیس افسران و اہلکار اپنی ذمہ داریاں احسن انداز سے ادا کررہے ہیں، عوام کے جان و مال کا تحفظ پولیس کی اولین ترجیح میں شامل ہے، جس پر کوئی سمجھوتہ نہیں کیا جائے گا، یومیہ بنیادوں پر ضلع کے تمام تھانوں کی کارکردگی کو مانیٹر کیا جارہا ہے، اچھی کارکردگی پر جزا اور بری کارکردگی پر سزا کا عمل بھی جاری ہے، تاجر برادری کا قیام امن کو یقینی بنانے میں اہم کردار ہے اور پولیس کے ساتھ تاجروں کے تعاون کو قدر کی نگاہ سے دیکھتے ہیں. ان خیالات کا اظہار انہوں نے اپنے دفتر میں تاجر سپریم کونسل سکھر کے صدر حاجی شفیع عباسی، ممتاز لکی، عبدالغفار، میمن نوید اقبال ارائیں اصف میمن مجیب اخوند، عبدالوحید ،محمد شاہد محمد امجد ودیگر سے ملاقات کے دوران بات چیت کررہے تھے. تاجر رہنماوں نے ایس ایس پی سکھر کو عمرے کی سعادت حاصل کرنے پر مبارک باد دی اور نیک تمناؤں کا اظہار کیا. اس موقع پر حاجی شفیع عباسی ودیگر نے شہریوں و تاجروں کو درپیش مسائل، سیکورٹی اقدامات، ٹریفک جام ودیگر مسائل سے متعلق تحفظات و خدشات کا اظہار بھی کیا اور انہیں حل کرنے کی گزارش بھی کی، ایس ایس پی سکھر نے انہیں اپنے بھرپور تعاون کا یقین دلایا اور نشاندہی کردہ مسائل کو فوری حل کرنے کے لئے متعلقہ افسران کو ہدایات بھی جاری کیں.