سیپکو ملازمین کو بونس کی ادائیگی کا اعلان، رقم کل تک بینک اکاؤنٹس میں منتقل کر دی جائے گی

سکھر: سکھر الیکٹرک پاور کمپنی لمیٹڈ (سیپکو) کی انتظامیہ نے ملازمین کو بونس کی ادائیگی کا اعلان کرتے ہوئے کہا ہے کہ بونس کی رقم ان شاء اللہ کل تک تمام ملازمین کے بینک اکاؤنٹس میں منتقل کر دی جائے گی۔ سیپکو ترجمان کے مطابق چیئرمین بورڈ آف ڈائریکٹرز سیپکو غلام مصطفیٰ لغاری، چیف ایگزیکٹو آفیسر سیپکو انجنیئر اعجاز احمد چنہ اور بورڈ آف ڈائریکٹرز کے معزز اراکین کی مشترکہ کاوشوں، مؤثر قیادت اور ملازمین کی فلاح و بہبود کے لیے بھرپور دلچسپی کے باعث یہ اہم اقدام ممکن ہو سکا ہے۔ سیپکو انتظامیہ نے بونس کی ادائیگی پر تمام ملازمین کو مبارکباد پیش کرتے ہوئے کہا ہے کہ ادارہ اپنے ملازمین کی فلاح، حوصلہ افزائی اور بہتر مستقبل کے لیے عملی اقدامات جاری رکھے گا۔ ملازمین ادارے کا قیمتی اثاثہ ہیں اور ان کی بہتری کے لیے ہر ممکن کوشش کی جا رہی ہے۔ اس موقع پر سیپکو ملازمین نے چیئرمین بورڈ آف ڈائریکٹرز، چیف ایگزیکٹو آفیسر اور بورڈ آف ڈائریکٹرز کا شکریہ ادا کرتے ہوئے اس عزم کا اظہار کیا ہے کہ وہ ادارے کی ترقی، بجلی کی بہتر فراہمی اور صارفین کو معیاری خدمات فراہم کرنے کے لیے مزید محنت، ذمہ داری اور جذبے کے ساتھ اپنی خدمات انجام دیتے رہیں گے۔ سیپکو انتظامیہ کے مطابق ملازمین کی فلاح و بہبود اور ادارے کی بہتری کے لیے مستقبل میں بھی ایسے اقدامات کا سلسلہ جاری رکھا جائے گا۔