اسلام آباد: اسلامی نظریاتی کونسل نے انبیائے کرامؑ اور مقدس شخصیات کی شبیہ، بصری تمثیل یا ان کی نمائندگی کرنے والے کسی بھی بصری مواد کی اشاعت کو شرعاً ناجائز قرار دیتے ہوئے اس سے مکمل اجتناب کرنے پر زور دیا ہے۔
علامہ ڈاکٹر راغب حسین نعیمی کی زیر صدارت ہونے والے اسلامی نظریاتی کونسل کے اجلاس میں ملکی صورتحال، قانونی امور اور عوامی مفاد سے متعلق متعدد معاملات پر غور کیا گیا اور مختلف قراردادوں کی منظوری دی گئی۔
اجلاس میں منظور کی گئی قرارداد کے مطابق انبیائے کرامؑ اور مقدس شخصیات کی شبیہ یا ان کی نمائندگی کرنے والے بصری مواد کی اشاعت سے مکمل گریز کیا جائے تاکہ ان پاک ہستیوں کے مقام و مرتبے کا تقدس برقرار رہے۔
اسلامی نظریاتی کونسل نے پیمرا کے نوٹس کو خوش آئند قرار دیتے ہوئے ذمہ داران کے خلاف قانونی کارروائی کا مطالبہ کیا۔ قرارداد میں کہا گیا کہ آزادیٔ اظہار رائے اور مذہبی حساسیت کے درمیان ذمہ دارانہ توازن برقرار رکھنا ناگزیر ہے۔
کونسل نے سفارش کی کہ میڈیا ہاؤسز میں پیشگی جانچ پڑتال اور مؤثر ایڈیٹوریل نگرانی کا نظام قائم کیا جائے تاکہ مستقبل میں اس نوعیت کے واقعات کا مستقل سدباب ممکن بنایا جا سکے۔
