سکھر میں پولیس مقابلہ، ڈاکو زخمی حالت میں گرفتار، دو ساتھی فرار، اسلحہ برآمد

سکھر: سکھر پولیس نے تھانہ سائیٹ ایریا کی حدود میں کامیاب کارروائی کرتے ہوئے پولیس مقابلے کے بعد ایک مطلوب ڈاکو کو زخمی حالت میں گرفتار کر لیا، جبکہ اس کے دو ساتھی فائرنگ کی آڑ میں فرار ہونے میں کامیاب ہوگئے. پولیس ترجمان کے مطابق تھانہ سائیٹ ایریا کی پولیس معمول کے گشت پر تھی کہ دہلی مسلم سوسائٹی کے قریب جرم کی نیت سے موجود مسلح ڈاکوؤں سے آمنا سامنا ہوگیا. پولیس کو دیکھتے ہی ملزمان نے فائرنگ شروع کر دی، جس پر پولیس نے بھی جوابی کارروائی کی. فائرنگ کے تبادلے کے دوران ایک ڈاکو زخمی ہوگیا، جسے پولیس نے گرفتار کر لیا، جبکہ اس کے دو ساتھی موقع سے فرار ہونے میں کامیاب ہوگئے. گرفتار زخمی ڈاکو کی شناخت شہریار عرف شیری بندھانی کے نام سے ہوئی ہے. پولیس کے مطابق گرفتار ملزم اسنیچنگ، چوری، ڈکیتی، پولیس مقابلوں اور دیگر سنگین جرائم کے متعدد مقدمات میں مطلوب تھا. پولیس نے گرفتار ملزم کے قبضے سے ایک ٹی ٹی پستول اور گولیاں بھی برآمد کر لی ہیں. زخمی ملزم کو ابتدائی طبی امداد کے لیے متعلقہ اسپتال منتقل کر دیا گیا ہے، جبکہ فرار ہونے والے ملزمان کی گرفتاری کے لیے علاقے میں سرچ آپریشن جاری ہے. پولیس کا کہنا ہے کہ گرفتار ڈاکو کے مکمل مجرمانہ ریکارڈ کی معلومات مختلف تھانوں اور دیگر اضلاع سے بھی حاصل کی جا رہی ہیں تاکہ اس کے خلاف درج مقدمات اور جرائم کی تفصیلات یکجا کی جا سکیں. دریں اثنا، ایس ایس پی سکھر اظہر خان نے کامیاب کارروائی پر تھانہ سائیٹ ایریا کے ایس ایچ او اور ان کی ٹیم کو شاباش دیتے ہوئے تعریفی سرٹیفکیٹ دینے کا اعلان کیا ہے.