سکھر (دانش راجپوت): سب ڈویژن گولیمار کے بیج نمبر 5 اور 6 میں بجلی چوری کے خلاف سیپکو نے بڑے پیمانے پر کریک ڈاؤن کرتے ہوئے متعدد غیر قانونی کنڈا کنکشن، ڈائریکٹ تاریں اور غیر قانونی جنکشن ختم کر دیے۔
ترجمان کے مطابق کارروائی ایس ڈی او نثار شیخ کی قیادت میں کی گئی، جس میں ٹاسک فورس کے انچارج عمران لودھی، پولیس اہلکاروں اور سیپکو کے عملے نے حصہ لیا۔
آپریشن کے دوران ٹرانسفارمرز سے منسلک درجنوں غیر قانونی کنڈا کنکشن اور ہیوی ڈائریکٹ تاریں کاٹ کر قبضے میں لے لی گئیں، جبکہ مختلف مقامات پر بجلی چوری کے لیے قائم غیر قانونی جنکشن بھی ختم کر دیے گئے۔
ذرائع کے مطابق ضبط کی گئی تاروں کی مقدار اتنی زیادہ تھی کہ سرکاری گاڑی مکمل طور پر ان تاروں سے بھر گئی۔
ذرائع کا یہ بھی کہنا ہے کہ اس مبینہ غیر قانونی نیٹ ورک میں ایک نام نہاد صحافی کے ملوث ہونے کی اطلاعات ہیں، تاہم اس حوالے سے تاحال کوئی سرکاری تصدیق سامنے نہیں آئی اور متعلقہ حکام کی جانب سے تحقیقات جاری ہیں۔
ایس ڈی او نثار شیخ نے کہا کہ بجلی چوری میں ملوث کسی بھی شخص کے ساتھ رعایت نہیں برتی جائے گی اور بلاامتیاز کارروائیاں جاری رکھی جائیں گی۔
نوٹ: نام نہاد صحافی کی مبینہ شمولیت سے متعلق معلومات ذرائع کے دعوؤں پر مبنی ہیں، جن کی متعلقہ حکام نے تاحال باضابطہ تصدیق نہیں کی۔ تحقیقات مکمل ہونے تک اس حوالے سے حتمی رائے قائم نہیں کی جا سکتی۔
