واشنگٹن: امریکی محکمہ خارجہ نے ملک کی آزادی کے 250 سال مکمل ہونے کے موقع پر محدود تعداد میں خصوصی پاسپورٹس جاری کرنے کا اعلان کیا ہے، جن میں سابق صدر ڈونلڈ ٹرمپ کی تصویر بھی نمایاں طور پر شامل ہوگی۔
رپورٹس کے مطابق ان خصوصی پاسپورٹس کے اندرونی سرورق پر ٹرمپ کی تصویر کے ساتھ اعلانِ آزادی کا متن، امریکی پرچم اور صدر کے دستخط سنہری رنگ میں دکھائے گئے ہیں۔ ایک اور صفحے پر بانیانِ امریکا کی تاریخی پینٹنگ بھی شامل کی گئی ہے، جس میں اعلانِ آزادی پر دستخط کا منظر پیش کیا گیا ہے۔
امریکی میڈیا کے مطابق یہ پاسپورٹس رواں موسمِ گرما میں جاری کیے جائیں گے اور یہ “America250” تقریبات کا حصہ ہیں۔ ان تقریبات میں اگست میں نیشنل مال پر فارمولہ ون ریس اور جون میں وائٹ ہاؤس کے ساؤتھ لان میں یو ایف سی مقابلہ بھی شامل ہیں۔
محکمہ خارجہ کے ترجمان ٹومی پگٹ کا کہنا ہے کہ امریکا جولائی میں اپنی 250ویں سالگرہ منا رہا ہے اور اس تاریخی موقع کی یادگار کے طور پر خصوصی ڈیزائن کے حامل پاسپورٹس تیار کیے جا رہے ہیں۔
یہ اقدام امریکا کی تاریخی وراثت کو اجاگر کرنے اور یومِ آزادی کی تقریبات کو یادگار بنانے کی ایک کوشش کے طور پر دیکھا جا رہا ہے۔
