اسلام آباد: نائب وزیراعظم اور وزیر خارجہ اسحاق ڈار نے کہا ہے کہ جب قوم یکجا ہو جاتی ہے تو دنیا کی کوئی طاقت اس کی بنیادوں کو متزلزل نہیں کرسکتی، جبکہ معرکہ حق میں قوم کا اتحاد پاکستان کی سب سے بڑی طاقت ثابت ہوا۔
معرکہ حق کی پہلی سالگرہ کے موقع پر اپنے ویڈیو پیغام میں اسحاق ڈار نے کہا کہ آج کا دن قومی تاریخ کا ایک اہم اور فیصلہ کن باب ہے۔ انہوں نے کہا کہ یہ صرف کیلنڈر کی ایک تاریخ نہیں بلکہ جرات، اتحاد اور غیرمتزلزل عزم کی علامت ہے۔
انہوں نے پاکستانی قوم کو خراج تحسین پیش کرتے ہوئے کہا کہ عوام نے مشکل وقت میں اتحاد اور یکجہتی کا مظاہرہ کیا، جس نے دشمن کے عزائم ناکام بنائے۔
مسلح افواج کو خراج تحسین
نائب وزیراعظم نے اپنے پیغام میں پاک فوج، فضائیہ اور بحریہ کے افسران اور جوانوں کو بھی خراج تحسین پیش کیا۔
انہوں نے کہا کہ قوم اور مسلح افواج نے مل کر ثابت کیا کہ پاکستان اپنی سلامتی اور خودمختاری کے دفاع کی مکمل صلاحیت رکھتا ہے۔
اسحاق ڈار کا کہنا تھا کہ فیلڈ مارشل کی قیادت میں دشمن کو بھرپور اور فیصلہ کن جواب دیا گیا۔
بھارتی جارحیت کا جواب
وزیر خارجہ نے کہا کہ گزشتہ سال بھارت کی جانب سے جارحیت مسلط کی گئی، تاہم پاکستان نے ابتدا میں تحمل اور ذمہ داری کا مظاہرہ کیا۔
انہوں نے کہا کہ پاکستان نے اپنے حق دفاع کو استعمال کرتے ہوئے بھارتی جارحیت کا متوازن اور مؤثر جواب دیا۔
اسحاق ڈار کے مطابق پاکستان نے بھارتی جنگی طیاروں سمیت مختلف عسکری اہداف کو کامیابی سے نشانہ بنایا اور دنیا کو واضح پیغام دیا کہ پاکستان اپنی خودمختاری پر کبھی سمجھوتا نہیں کرے گا۔
عالمی سطح پر پاکستان کا مؤقف
انہوں نے کہا کہ پاکستان نے فعال سفارتکاری کے ذریعے عالمی سطح پر اپنا مؤقف بھرپور انداز میں پیش کیا۔
وزیر خارجہ کے مطابق پاکستان نے دنیا کو یہ باور کرایا کہ خطے میں امن کا قیام بنیادی تنازعات کے حل سے مشروط ہے۔
انہوں نے کہا کہ جنوبی ایشیا میں پائیدار امن مسئلہ کشمیر سمیت اہم تنازعات کے حل کے بغیر ممکن نہیں۔
مسئلہ کشمیر پر مؤقف
اسحاق ڈار نے کہا کہ مسئلہ کشمیر کا حل اقوام متحدہ کی قراردادوں کے مطابق ہونا چاہیے۔
انہوں نے ایک بار پھر اس بات پر زور دیا کہ پاکستان کشمیری عوام کے حق خودارادیت کی سیاسی، سفارتی اور اخلاقی حمایت جاری رکھے گا۔
امن اور ترقی کا عزم
نائب وزیراعظم نے کہا کہ پاکستان خطے میں امن کے فروغ کے لیے پُرعزم ہے، تاہم قومی سلامتی کو درپیش کسی بھی خطرے کا پوری قوت سے جواب دیا جائے گا۔
انہوں نے اس امید کا اظہار کیا کہ پاکستان نہ صرف دفاعی میدان میں بلکہ معیشت، تعلیم، ٹیکنالوجی اور دیگر شعبوں میں بھی مزید مضبوط اور مستحکم ہوگا۔
اسحاق ڈار نے کہا کہ قومی اتحاد، مضبوط قیادت اور عوامی اعتماد ہی پاکستان کی اصل طاقت ہیں اور انہی کے ذریعے ملک ترقی اور استحکام کی راہ پر گامزن رہے گا۔
