معرکہ حق میں اہم بھارتی اہداف ہمارے نشانے پر تھے، امریکی صدر نے بھارت کو بڑے نقصان سے بچایا: محسن نقوی

اسلام آباد: وفاقی وزیر داخلہ محسن نقوی نے کہا ہے کہ معرکہ حق میں پاکستان کو اللہ تعالیٰ کی مدد سے کامیابی حاصل ہوئی جبکہ فیلڈ مارشل عاصم منیر کو خصوصی الٰہی مدد حاصل ہے۔ انہوں نے دعویٰ کیا کہ جنگ کے دوران بھارت کے اہم عسکری اہداف پاکستان کے نشانے پر تھے اور امریکی صدر ڈونلڈ ٹرمپ نے بھارت کو بڑے نقصان سے بچایا۔

وزیر مملکت برائے داخلہ طلال چوہدری کے ہمراہ پریس کانفرنس کرتے ہوئے محسن نقوی نے کہا کہ ملک بھر میں معرکہ حق کی کامیابی کے حوالے سے تقریبات منعقد کی جارہی ہیں اور افواج پاکستان نے اس معرکے میں قوم کا سر فخر سے بلند کیا۔

بھارتی ڈرونز اور سائبر حملوں کا دعویٰ

وزیر داخلہ نے کہا کہ بھارت نے چھوٹے اور درمیانے سائز کے ڈرونز پاکستان کے مختلف علاقوں میں بھیجے تاہم بیشتر ڈرونز کو سرحد پر ہی رینجرز نے تباہ کردیا۔

انہوں نے دعویٰ کیا کہ بھارت نے سائبر حملوں کی بھی کوشش کی لیکن پاکستان کی صلاحیتوں کے سامنے بھارت اس میدان میں کامیاب نہ ہوسکا۔

محسن نقوی کا کہنا تھا کہ پاک بھارت کشیدگی کے دوران پہلی مرتبہ ڈرونز کا اتنی بڑی تعداد میں استعمال دیکھنے میں آیا، جو جدید جنگی حکمت عملی کا حصہ تھا۔

نئی دہلی میں ڈرونز کی موجودگی کا دعویٰ

وفاقی وزیر داخلہ نے دعویٰ کیا کہ نئی دہلی میں بھارتی وزیراعظم کی رہائش گاہ کے اوپر پاکستانی ڈرونز گردش کرتے رہے جس سے بھارتی حکام خوفزدہ تھے۔

انہوں نے کہا کہ پاکستان نے کبھی بھارتی شہری آبادی کو نشانہ نہیں بنایا جبکہ بھارت نے پاکستان کی سول آبادی کو ٹارگٹ کیا۔

ان کا کہنا تھا کہ سرحد پر پاکستانی رینجرز مکمل تیاری کے ساتھ موجود تھیں اور بھارت کو بالآخر سفید جھنڈے لہرانا پڑے۔

پاکستانی میڈیا کے کردار کی تعریف

محسن نقوی نے پاک بھارت کشیدگی کے دوران پاکستانی میڈیا کے کردار کو بھی سراہتے ہوئے کہا کہ میڈیا نے قوم کو متحد رکھنے میں اہم کردار ادا کیا۔

انہوں نے کہا کہ پاکستانی میڈیا نے ذمہ دارانہ رپورٹنگ کے ذریعے ایک مؤثر قومی بیانیہ پیش کیا جبکہ بھارتی میڈیا کنفیوژن کا شکار رہا۔

بھارتی آئل ڈیپو تباہ کرنے کا دعویٰ

وزیر داخلہ نے کہا کہ جنگ بندی سے قبل بھارت نے پاکستان کے ایک ایئر بیس پر حملہ کیا تھا جس کے جواب میں پاکستان نے نہایت حساس مقام کو نشانہ بنایا۔

ان کے مطابق پاکستان نے بھارت کا ایک بڑا آئل ڈیپو تباہ کیا جبکہ کئی ایسی کارروائیاں بھی ہوئیں جنہیں دیکھ کر یقین کرنا مشکل تھا۔

انہوں نے دعویٰ کیا کہ بھارت کے اہم فوجی اہداف، جنگی طیارے اور بحری تنصیبات پاکستان کے نشانے پر تھیں، اسی وجہ سے بھارت جنگ بندی پر آمادہ ہوا۔

انٹیلی جنس اداروں کے کردار کی تعریف

محسن نقوی نے پاکستانی انٹیلی جنس اداروں کے کردار کو غیرمعمولی قرار دیتے ہوئے کہا کہ اگر بروقت معلومات نہ ملتیں تو کامیابی ممکن نہ تھی۔

انہوں نے کہا کہ پاکستان کو بھارت کے اندرونی حالات اور ممکنہ اقدامات کے بارے میں ایسی معلومات موصول ہورہی تھیں جیسے وہ اپنا ہی ملک ہو۔

وزیر داخلہ نے کہا کہ آپریشن بنیان مرصوص میں دونوں انٹیلی جنس اداروں نے مرکزی کردار ادا کیا اور ان کی کارکردگی پر وہ خود حیران تھے۔

امریکی صدر ٹرمپ سے متعلق بیان

محسن نقوی نے دعویٰ کیا کہ پاک بھارت جنگ کے دوران امریکی صدر ڈونلڈ ٹرمپ نے بھارت کو بڑے نقصان سے بچایا۔

ان کے مطابق بھارت کو اس معرکے میں اتنا نقصان پہنچا کہ آئندہ پاکستان کے خلاف کسی بھی مہم جوئی سے قبل اسے کئی بار سوچنا پڑے گا۔

ایران امریکا معاملات پر بھی گفتگو

ایک سوال کے جواب میں وزیر داخلہ نے ایران اور امریکا کے تعلقات پر بھی بات کی اور کہا کہ انہوں نے ان معاملات کو بنتے اور بگڑتے دیکھا ہے۔

انہوں نے کہا کہ امریکا اور ایران کے درمیان ممکنہ جنگ بندی یا مذاکرات میں فیلڈ مارشل عاصم منیر کی کوششوں پر اعتماد رکھنا چاہیے۔