واشنگٹن: وفاقی وزیر خزانہ سینیٹر محمد اورنگزیب نے کہا ہے کہ سعودی عرب کی جانب سے 3 ارب ڈالر کی مالی معاونت اگلے ہفتے تک پاکستان کو موصول ہو جائے گی، جو ملکی زرمبادلہ کے ذخائر کو مستحکم بنانے میں اہم کردار ادا کرے گی۔
واشنگٹن میں پاکستانی سفارتخانے میں میڈیا سے گفتگو کرتے ہوئے وزیر خزانہ نے بتایا کہ ان کی سعودی ہم منصب کے ساتھ تفصیلی ملاقات ہوئی ہے۔ انہوں نے کہا کہ اس سے قبل بھی گزشتہ جمعہ کو اسلام آباد میں سعودی وزیر خزانہ سے بات چیت ہوئی تھی، جس میں واضح کیا گیا کہ 3 ارب ڈالر اضافی ڈپازٹ کی صورت میں فراہم کیے جائیں گے۔
محمد اورنگزیب نے کہا کہ سعودی حکومت کی جانب سے یہ سپورٹ بروقت ملے گی اور توقع ہے کہ آئندہ ہفتے تک یہ رقم پاکستان کے اکاؤنٹس میں منتقل ہو جائے گی۔ انہوں نے مزید بتایا کہ پاکستان نے گزشتہ ہفتے 1.4 ارب ڈالر کی ادائیگیاں کی ہیں اور حکومت تمام مالی ذمہ داریاں وقت پر پوری کرنے کے لیے پرعزم ہے۔
وزیر خزانہ کے مطابق یہ رقم اب سالانہ رول اوور کے بجائے 2028 تک میچورٹی مدت کے ساتھ فراہم کی جا رہی ہے، جو پاکستان کے لیے ایک مثبت پیش رفت ہے اور اس سے مالی استحکام میں مدد ملے گی۔
انہوں نے سعودی عرب کی قیادت، خصوصاً ولی عہد شہزادہ محمد بن سلمان اور سعودی وزیر خزانہ کا شکریہ ادا کرتے ہوئے کہا کہ یہ تعاون دونوں ممالک کے مضبوط تعلقات کا مظہر ہے۔
ماہرین کے مطابق اس مالی معاونت سے پاکستان کے زرمبادلہ کے ذخائر میں بہتری آئے گی اور معاشی دباؤ میں کمی ہوگی، جس سے ملکی معیشت کو استحکام حاصل ہو سکتا ہے۔
