پاکستان کی میزبانی میں علاقائی امن کے لیے اہم پیش رفت متوقع
اسحاق ڈار نے تصدیق کی ہے کہ سعودی عرب، ترکیے اور مصر کے وزرائے خارجہ کل اسلام آباد میں اہم ملاقات کریں گے، جس کا مقصد مشرق وسطیٰ میں جاری کشیدگی کے خاتمے کے لیے مشترکہ حکمت عملی پر غور کرنا ہے۔
نجی گفتگو میں اسحاق ڈار نے بتایا کہ یہ ملاقات پہلے ترکیے میں طے تھی، تاہم مصروفیات کے باعث اسے اسلام آباد منتقل کر دیا گیا۔ انہوں نے کہا کہ پاکستان نیک نیتی اور سنجیدگی کے ساتھ خطے میں امن کے قیام کے لیے کردار ادا کر رہا ہے اور دوست ممالک بھی اس سلسلے میں بھرپور تعاون کر رہے ہیں۔
انہوں نے مزید بتایا کہ تینوں ممالک کے وزرائے خارجہ اگلے روز شہباز شریف سے بھی ملاقات کریں گے، جس میں امن مذاکرات کو آگے بڑھانے کے حوالے سے اہم مشاورت کی جائے گی۔
اسحاق ڈار کے مطابق ایران کے ساتھ بھی رابطے جاری ہیں، تاہم مذاکرات کی حساسیت کے پیش نظر میڈیا پر تفصیلات شیئر کرنے سے گریز کیا جا رہا ہے۔
یاد رہے کہ حالیہ دنوں میں یہ اطلاعات بھی سامنے آئی تھیں کہ امریکا نے جنگ بندی کے لیے پاکستان کے ذریعے ایران کو ایک 15 نکاتی فارمولا پیش کیا، جس پر ایران نے جواب بھی پاکستان کے ذریعے ہی پہنچایا۔ یہ پیش رفت پاکستان کے بڑھتے ہوئے سفارتی کردار کو ظاہر کرتی ہے، جو خطے میں کشیدگی کم کرنے کے لیے سرگرم عمل ہے۔
