سکھر بیراج سے نکلنے والی نہروں کی سالانہ بندش کا شیڈول جاری

سکھر (بیورورپورٹ)چیف انجینئر سکھر بیراج لیفٹ بینک ریجن کی جانب سے جاری کردہ اعلامیے کے مطابق سکھر بیراج سے نکلنے والی تمام نہروں کی سالانہ بندش کا باقاعدہ شیڈول جاری کر دیا گیا ہے۔ یہ بندش نہری نظام کے معائنے، ضروری مرمتی کام اور دیکھ بھال کے سلسلے میں کی جا رہی ہے۔اعلامیے کے مطابق 6 جنوری 2026 سے 20 جنوری 2026 تک سکھر بیراج سے نکلنے والی تمام نہریں مکمل طور پر بند رہیں گی، جس کے باعث اس دوران پانی کی فراہمی مکمل طور پر معطل رہے گی۔ بند رہنے والی نہروں میں این ڈبلیو کینال، دادو کینال، خیرپور فیڈر ایسٹ، خیرپور فیڈر ویسٹ، روہڑی مین کینال اور نارا کینال شامل ہیں۔اعلامیے میں مزید بتایا گیا ہے کہ 6 جنوری 2026 کو بیراج کے پونڈ میں پانی کی سطح کم کی جائے گی،جبکہ مرمتی اور دیکھ بھال کے تمام کام مکمل ہونے کے بعد 20 جنوری 2026 سے دوبارہ پانی کی بھرائی کا عمل شروع کر دیا جائے گا۔چیف انجینئر کے مطابق سالانہ بندش سکھر بیراج اور اس سے منسلک وسیع نہری نظام کی مضبوطی، حفاظت اور مؤثر کارکردگی کو برقرار رکھنے کے لیے نہایت اہم ہے۔ اعلامیے میں نہروں پر انحصار کرنے والے آبادگاروں اور زمینداروں کو پیشگی اطلاع دیتے ہوئے اپیل کی گئی ہے کہ وہ مقررہ بندش کے شیڈول کو مدنظر رکھتے ہوئے اپنے آبپاشی کے امور کی بروقت اور مناسب منصوبہ بندی کریں، تاکہ کسی بھی ممکنہ نقصان یا مشکلات سے بچا جا سکے۔