گھوٹکی: سیاہ کاری کے جھوٹے جرگے کا ڈی آئی جی سکھر رینج نے نوٹس لے لیا

سکھر/ گھوٹکی میں سیاہ کاری کے جھوٹے جرگے کے معاملے پر ڈی آئی جی سکھر رینج کیپٹن (ر) فیصل عبداللہ چاچڑ نے فوری نوٹس لیا ہے۔ ایس ایس پی گھوٹکی انور کھیتران کی ہدایت پر پولیس نے کارروائی کرتے ہوئے جرگے میں ملوث ایک ملزم کو گرفتار کر لیا ہے۔
ڈہرکی کے علاقے میں ہونے والے اس غیرقانونی جرگے میں ملزم شاھنواز بھیو پر سیاہ کاری کا جھوٹا الزام لگا کر 10 لاکھ روپے وصول کرنے اور دو لڑکیوں کو بطور عیوضہ دینے کا فیصلہ کرنے کا الزام ہے۔گرفتار ملزم کے خلاف قانونی کارروائی کے طور پر مقدمہ درج کر لیا گیا ہے جبکہ جرگے میں ملوث دیگر چھ ملزمان کی گرفتاری کے لیے پولیس نے چھاپے شروع کر دیے ہیں۔
اس موقع پر ایس ایس پی گھوٹکی انور کھیتران نے کہا کہ پولیس غیرقانونی جرگوں کے خلاف زیرو ٹالرینس پالیسی پر عمل پیرا ہے اور کوئی بھی شخص قانون کے دائرے سے باہر جرگے یا دیگر غیرقانونی کارروائیوں میں ملوث نہیں رہے گا۔ انہوں نے شہریوں سے اپیل کی ہے کہ ایسے معاملات میں فوری طور پر پولیس سے رابطہ کریں تاکہ بروقت اور مؤثر کارروائی کی جا سکے۔پولیس ذرائع کا کہنا ہے کہ جاری چھاپوں کے ذریعے دیگر ملزمان کی گرفتاری عمل میں لائی جائے گی تاکہ عوام میں عدلیہ اور قانون کی بالادستی کو یقینی بنایا جا سکے۔