بنگلورو: بھارتی ریاست کرناٹکا میں مشہور ریئلیٹی شو ’بگ باس کنڑ سیزن 12‘ کو اچانک بند کرکے اسٹوڈیو سیل کر دیا گیا۔
بھارتی میڈیا کے مطابق کرناٹک حکومت کے حکام نے منگل کی رات کو بنگلورو شہر کے نواح میں واقع جالی وُڈ اسٹوڈیوز اینڈ ایڈونچرز کے احاطے کو بند کرتے ہوئے وہاں شوٹ ہونے والے ریئلیٹی شو ’بگ باس کنڑ‘ کے سیٹ کو سیل کر دیا۔
کرناٹک اسٹیٹ پولیوشن کنٹرول بورڈ نے ماحولیاتی قوانین کی خلاف ورزی اور اجازت ناموں کے بغیر کام جاری رکھنے پر اسٹوڈیو کو فوری طور پر بند کرنے کے احکامات جاری کیے۔
بورڈ نے واضح کیا کہ اسٹوڈیو انتظامیہ نے ماحولیاتی قوانین کی مسلسل خلاف ورزی کی، جس پر یہ فیصلہ ناگزیر تھا۔
تمام بگ باس کے شرکاء کو گھر خالی کرنے کا حکم دیا گیا اور انہیں سکیورٹی کے ساتھ احاطے سے باہر منتقل کر دیا گیا۔
اس وقت ’بگ باس کنڑ‘ کے سیزن 12 کی میزبانی معروف کنڑ اداکار کچا سدیپ کر رہے تھے اور یہ نیا سیزن حال ہی میں شروع ہوا تھا۔بگ باس کا سیٹ جو 5 کروڑ روپے کی لاگت سے تیار کیا گیا تھا، اب مکمل طور پر سیل کر دیا گیا ہے۔
بھارتی میڈیا کے مطابق شو کی بندش کے بعد 700 سے زائد افراد، جن میں تکنیکی عملہ بھی شامل ہے گھر واپس چلے گئے۔
اس پیش رفت پر ردِعمل دیتے ہوئے وزیرِ جنگلات نے کہا کہ خلاف ورزیوں پر نوٹس جاری ہونے کے باوجود انتظامیہ نے سرگرمیاں جاری رکھیں، کوئی بھی قانون سے بالاتر نہیں ہے اور قانون کے مطابق کارروائی کی جائے گی۔
انہوں نے مزید کہا کہ ویلز اسٹوڈیوز اینڈ انٹرٹینمنٹ کو مارچ 2024 میں نوٹس جاری کیا گیا تھا۔میرے علم کے مطابق ان کے پاس واٹر اور ائیر ایکٹ کے تحت درکار اجازت نامے نہیں ہیں۔افسران سے بات کرنے کے بعد پتہ چلا کہ انہوں نے اجازت حاصل کرنے کی زحمت بھی نہیں کی۔
انہوں نے مزید کہا کہ بار بار معائنے اور نوٹس جاری ہونے کے باوجود، وہاں کی سرگرمیاں جاری رہیں، جو سپریم کورٹ اور نیشنل گرین ٹریبونل (NGT) کے احکامات کی خلاف ورزی ہے۔
انہوں نے مزید کہا کہ اگر منتظمین چاہیں تو عدالت سے رجوع کر سکتے ہیں۔
