لاہور: پاکستانی شوبز انڈسٹری کی معروف اداکارہ رمشا خان نے بالآخر ساتھی اداکار خوشال خان سے اپنی شادی کی تصدیق کر دی ہے، جس کے بعد سوشل میڈیا پر گردش کرنے والی افواہیں درست ثابت ہو گئیں۔
گزشتہ چند روز سے دونوں اداکاروں کی شادی کی خبریں زیرِ گردش تھیں، جبکہ شوبز سے تعلق رکھنے والی چند معروف شخصیات کی جانب سے بھی اس خبر کی تصدیق کی گئی تھی۔ اس دوران رمشا اور خوشال کے نکاح کی ایک تصویر بھی سوشل میڈیا پر وائرل ہوئی، جس نے مداحوں کی دلچسپی اور تجسس میں مزید اضافہ کر دیا۔
تاہم اب رمشا خان نے انسٹاگرام پر ایک اسٹوری شیئر کرتے ہوئے نہ صرف اپنی شادی کی تصدیق کی بلکہ وائرل ہونے والی تصاویر پر بھی ردعمل دیا۔ انہوں نے تصاویر لیک کرنے والوں پر ناراضی کا اظہار کرتے ہوئے کہا کہ نجی لمحات کو اس طرح منظرِ عام پر لانا مناسب نہیں۔
اداکارہ کے بیان کے بعد مداحوں کی جانب سے مبارکبادوں کا سلسلہ شروع ہو گیا ہے، جبکہ سوشل میڈیا پر اس جوڑی کے لیے نیک خواہشات کا اظہار کیا جا رہا ہے۔
رمشا خان اور خوشال خان دونوں ہی پاکستان کے مقبول اداکاروں میں شمار ہوتے ہیں اور مختلف ڈراموں میں اپنی اداکاری کے باعث شہرت حاصل کر چکے ہیں۔ ان کی شادی کی خبر شوبز حلقوں میں بھی خاصی توجہ حاصل کر رہی ہے۔
