ڈپٹی کمشنر گھوٹکی منظور احمد اور ایس ایس پی گھوٹکی محمد انور کھیتران کا میرپور ماتھیلو چلڈرن اسپتال کا دورہ، دو ماہ میں NICU سمیت تمام شعبے فعال کرنے کا اعلان

میرپور ماتھیلو، 21 جولائی 2026: ڈپٹی کمشنر گھوٹکی منظور احمد اور ایس ایس پی گھوٹکی محمد انور کھیتران نے میرپور ماتھیلو میں قائم ہونے والے اسٹیٹ آف دی آرٹ چلڈرن اسپتال کا دورہ کرتے ہوئے مختلف وارڈز، طبی سہولیات اور جاری تیاریوں کا تفصیلی جائزہ لیا۔ اس موقع پر ڈسٹرکٹ ہیلتھ آفیسر ڈاکٹر راؤ آفتاب، ڈسٹرکٹ منیجر پی پی ایچ آئی محمد عارف عباسی اور اسپتال کا عملہ بھی موجود تھا۔ اس موقع پر ڈپٹی کمشنر منظور احمد نے گفتگو کرتے ہوئے کہا کہ میرپور ماتھیلو میں جدید سہولیات سے آراستہ چلڈرن اسپتال کا قیام ضلع گھوٹکی سمیت گرد و نواح کے اضلاع کے عوام کے لیے حکومت سندھ کا ایک بہترین تحفہ ہے۔ انہوں نے کہا کہ صحت مند بچے ہی صحت مند معاشرے اور روشن مستقبل کی ضمانت ہیں، اس لیے بچوں کو معیاری، بروقت اور محفوظ طبی سہولیات کی فراہمی حکومت کی اولین ترجیحات میں شامل ہے۔ انہوں نے مزید کہا کہ اس اسپتال کے فعال ہونے سے نومولود بچوں سے لے کر مختلف بیماریوں میں مبتلا بچوں کو اپنے ہی ضلع میں اعلیٰ معیار کی طبی سہولیات اور علاج میسر آئے گا، جس سے والدین کو علاج کی غرض سے دیگر شہروں کا رخ کرنے کی زحمت سے بھی نجات ملے گی۔ ایس ایس پی گھوٹکی محمد انور کھیتران نے کہا کہ بچے قوم کا قیمتی سرمایہ ہیں اور ان کی بہتر صحت، مناسب نشوونما اور بروقت علاج ہی ایک صحت مند اور مضبوط نسل کی بنیاد ہے۔ انہوں نے کہا کہ جدید چلڈرن اسپتال کے قیام سے ضلع کے ہزاروں خاندان مستفید ہوں گے۔ قبل ازیں چلڈرن اسپتال کے منیجر آپریشن مسلم شاہ نے ڈپٹی کمشنر کو بریفنگ دیتے ہوئے بتایا کہ ابتدائی مرحلے میں روزانہ صبح 8 بجے سے شام 5 بجے تک 100 سے زائد بچوں کو ماہر ڈاکٹروں کی نگرانی میں او پی ڈی کی سہولت فراہم کی جا رہی ہے۔ انہوں نے بتایا کہ آئندہ دو ماہ کے دوران این آئی سی یو (NICU)، انڈور وارڈز سمیت اسپتال کے تمام شعبوں کو مکمل طور پر فعال بنا دیا جائے گا، جس کے بعد اسپتال میں 24 گھنٹے اعلیٰ معیار کی طبی خدمات بلکل مفت فراہم کی جائیں گی۔