اسلام آباد: وزیراعظم شہباز شریف نے امریکا کے 250ویں یومِ آزادی کے موقع پر امریکی صدر ڈونلڈ ٹرمپ اور امریکی عوام کو مبارکباد دیتے ہوئے کہا ہے کہ پاکستان پائیدار جمہوری اقدار کی اس خوشی میں امریکا کے ساتھ شریک ہے اور دونوں ممالک کے درمیان سات دہائیوں سے زائد عرصے پر محیط شراکت داری مستقبل میں بھی مزید مستحکم ہوگی۔
وزیراعظم شہباز شریف نے اپنے تہنیتی پیغام میں کہا کہ پاکستان اور امریکا کے تعلقات کئی دہائیوں پر محیط ہیں، جو باہمی احترام، تعاون اور مشترکہ مفادات پر استوار ہیں۔ انہوں نے کہا کہ دونوں ممالک نے مختلف ادوار میں علاقائی اور عالمی چیلنجز کا مل کر سامنا کیا ہے اور یہ تعاون مستقبل میں بھی جاری رہے گا۔
انہوں نے کہا کہ پاکستانی نژاد امریکی برادری نے دونوں ممالک کے درمیان تعلقات کو مضبوط بنانے میں اہم کردار ادا کیا ہے۔ وزیراعظم کے مطابق یہ برادری دونوں ملکوں کے درمیان ایک مضبوط پل کی حیثیت رکھتی ہے اور تجارت، تعلیم، سائنس، ٹیکنالوجی اور دیگر شعبوں میں تعاون کے فروغ میں نمایاں خدمات انجام دے رہی ہے۔
شہباز شریف نے کہا کہ عالمی امن اور استحکام کو درپیش مختلف چیلنجز کے دوران پاکستان اور امریکا نے ایک دوسرے کے ساتھ تعاون کیا اور مشترکہ مقاصد کے حصول کے لیے مل کر کام کیا۔
وزیراعظم نے اپنے بیان میں جنوبی ایشیا میں امن کے لیے امریکی صدر ڈونلڈ ٹرمپ کے کردار کو بھی سراہتے ہوئے کہا کہ وہ اس کردار کو تسلیم کرتے ہیں، جس کے باعث ایک ممکنہ تباہ کن جنگ کو روکنے اور کروڑوں انسانی جانوں کو محفوظ بنانے میں مدد ملی۔
انہوں نے مزید کہا کہ عالمی تنازعات کے پرامن حل اور کشیدگی میں کمی کے لیے صدر ٹرمپ کی سفارتی کوششیں قابلِ تحسین ہیں اور ایسے اقدامات عالمی امن و سلامتی کے فروغ میں اہم کردار ادا کرتے ہیں۔
وزیراعظم شہباز شریف نے اس عزم کا اعادہ کیا کہ پاکستان امریکا کے ساتھ اپنی دوطرفہ شراکت داری کو مزید وسعت دینے، باہمی تجارت، سرمایہ کاری، دفاع، تعلیم، توانائی، موسمیاتی تبدیلی اور دیگر اہم شعبوں میں تعاون کو فروغ دینے کے لیے پرعزم ہے۔
انہوں نے اپنے پیغام کے اختتام پر کہا کہ پاکستان اور امریکا باہمی اعتماد، احترام اور مشترکہ مفادات کی بنیاد پر ایک روشن، محفوظ اور امید افزا مستقبل کی جانب پیش رفت کر رہے ہیں، اور دونوں ممالک کے تعلقات آنے والے برسوں میں مزید مستحکم ہوں گے۔
