لاہور: سانحہ کاہنہ ٹیوشن سینٹر کی تحقیقات کے لیے جوڈیشل ٹربیونل تشکیل دینے کے مطالبے پر مبنی خط گورنر پنجاب، وزیراعلیٰ پنجاب اور دیگر متعلقہ حکام کو ارسال کر دیا گیا ہے۔
ایڈووکیٹ محمد اظہر صدیق کی جانب سے بھیجے گئے خط میں مؤقف اختیار کیا گیا ہے کہ لاہور میں غیر رجسٹرڈ ٹیوشن سینٹر کی چھت گرنے کا واقعہ متعلقہ اداروں کی ناکامی کا نتیجہ ہے۔
خط میں مطالبہ کیا گیا ہے کہ صوبے بھر کے غیر رجسٹرڈ تعلیمی اداروں کو فوری طور پر رجسٹرڈ کیا جائے اور سانحہ کاہنہ کی شفاف تحقیقات کے لیے جوڈیشل ٹربیونل قائم کیا جائے۔
خاتون ٹیچر کا بیان
دوسری جانب حادثے میں زخمی ہونے والی خاتون ٹیچر کا کہنا ہے کہ چھت کو پکا کروایا گیا تھا، تاہم مالی وسائل نہ ہونے کی وجہ سے لینٹر نہیں ڈالا جا سکا۔
انہوں نے بتایا کہ چھت گرنے کے وقت گھر میں کوئی تعمیراتی کام جاری نہیں تھا، جبکہ ان کے شوہر گھر کے قریب پھلوں کی ریڑھی لگاتے ہیں۔
پس منظر
واضح رہے کہ دو روز قبل لاہور کے علاقے کاہنہ میں ایک ٹیوشن سینٹر کی چھت گرنے سے 14 بچے جاں بحق ہو گئے تھے، جس کے بعد واقعے کی تحقیقات اور ذمہ داران کے تعین کا مطالبہ زور پکڑ گیا ہے۔
