کراچی: محکمہ موسمیات نے پیشگوئی کی ہے کہ جولائی کے پہلے ہفتے میں ملک کے مختلف علاقوں میں مون سون بارشوں کا سلسلہ شروع ہونے کا امکان ہے، جبکہ کئی علاقوں میں گرج چمک کے ساتھ بارش متوقع ہے۔
محکمہ موسمیات کے مطابق آج شام یا رات سے مغربی ہواؤں کا ایک سلسلہ ملک میں داخل ہونے کا امکان ہے، جس کے باعث جولائی کے پہلے ہفتے میں مختلف علاقوں میں بارشیں شروع ہو سکتی ہیں۔
ادارے کے مطابق بحیرہ عرب سے آنے والی مرطوب ہوائیں ملک کے مشرقی اور وسطی علاقوں میں داخل ہو رہی ہیں، جبکہ 2 جولائی سے یہ مرطوب ہوائیں بالائی علاقوں تک بھی پہنچ جائیں گی، جس کے نتیجے میں یکم سے 6 جولائی کے دوران ملک کے بیشتر حصوں میں گرج چمک کے ساتھ بارش کا امکان ہے۔
محکمہ موسمیات نے بتایا کہ 3 اور 4 جولائی کو سندھ کے شہروں سکھر، جیکب آباد اور لاڑکانہ میں بھی گرج چمک کے ساتھ ہلکی بارش متوقع ہے۔
کراچی کے حوالے سے محکمہ موسمیات کا کہنا ہے کہ شہر میں 13 جولائی تک باقاعدہ بارش کا کوئی امکان نہیں، تاہم آئندہ تین روز کے دوران موسم مرطوب اور مطلع جزوی ابر آلود رہنے کی توقع ہے، جبکہ بعض علاقوں میں ہلکی بوندا باندی ہو سکتی ہے۔
محکمہ موسمیات کے مطابق کراچی میں آئندہ تین روز کے دوران تیز ہوائیں بھی چلنے کا امکان ہے، جن کی رفتار 30 سے 40 کلومیٹر فی گھنٹہ تک پہنچ سکتی ہے۔
ماہرین نے شہریوں کو مشورہ دیا ہے کہ وہ موسم کی تازہ صورتحال سے باخبر رہیں اور بارش یا تیز ہواؤں کے دوران احتیاطی تدابیر اختیار کریں، جبکہ متعلقہ ادارے بھی ممکنہ مون سون بارشوں کے پیش نظر ضروری انتظامات مکمل رکھیں۔
