لاہور: لاہور کے علاقے کاہنہ میں ایک اسکول اکیڈمی کی چھت گرنے سے کم از کم 8 بچے جاں بحق ہوگئے، جبکہ متعدد بچوں کے ملبے تلے دبے ہونے کی اطلاعات پر امدادی کارروائیاں جاری ہیں۔
ریسکیو حکام کے مطابق واقعے کی اطلاع ملتے ہی امدادی ٹیمیں موقع پر پہنچ گئیں اور ملبہ ہٹانے کا کام شروع کر دیا گیا۔ ابتدائی اطلاعات کے مطابق 15 سے زائد بچوں کے ملبے تلے دبے ہونے کا خدشہ ظاہر کیا گیا ہے۔
ریسکیو حکام کا کہنا ہے کہ متاثرہ عمارت صبح کے اوقات میں اسکول کے طور پر استعمال ہوتی ہے، جبکہ بعد ازاں وہاں اکیڈمی اور ٹیوشن کلاسز بھی چلائی جاتی ہیں۔
مقامی رہائشیوں کے مطابق واقعے کے وقت بچے اکیڈمی میں ٹیوشن پڑھنے آئے ہوئے تھے کہ اچانک چھت منہدم ہوگئی، جس کے نتیجے میں متعدد بچے ملبے تلے دب گئے۔
امدادی ٹیمیں، ریسکیو اہلکار اور دیگر متعلقہ ادارے ملبہ ہٹانے اور متاثرہ بچوں کو نکالنے میں مصروف ہیں، جبکہ زخمیوں کو فوری طور پر قریبی اسپتال منتقل کیا جا رہا ہے۔
حکام کے مطابق ریسکیو آپریشن مکمل ہونے کے بعد ہی جانی نقصان اور زخمیوں کی حتمی تعداد سے متعلق تصدیق کی جا سکے گی، جبکہ واقعے کی وجوہات جاننے کے لیے بھی تحقیقات کا آغاز کر دیا گیا ہے۔
