اسلام آباد: وفاقي حڪومت ملڪ ۾ غيرقانوني طور رهندڙ افغان شهرين جي گرفتاري جو فيصلو ڪري ورتو آهي، جنهن تي عملدرآمد لاءِ گهرو وزارت سمورن لاڳاپيل اختيارين کي هدايتون جاري ڪري ڇڏيون آهن.
وفاقي گهرو وزارت چئني صوبن جي چيف سيڪريٽرين، گلگت بلتستان ۽ آزاد ڄمون ڪشمير جي چيف سيڪريٽرين کي خط موڪليو آهي، جڏهن ته اسلام آباد جي چيف ڪمشنر کي پڻ ان حوالي سان هدايتون جاري ڪيون ويون آهن.
گهرو وزارت جي خط موجب، 10 جولاءِ کان اهڙن سڀني افغان شهرين کي گرفتار ڪيو ويندو، جيڪي بغير ويزا جي پاڪستان ۾ رهائش پذير آهن.
خط ۾ وڌيڪ چيو ويو آهي ته افغان شهرين، خاص طور تي ويزا کان سواءِ رهندڙ يا ويزا جي مدي کان وڌيڪ رهندڙ (اوورسٽي) ماڻهن جي ملڪ بدري (ڊي پورٽيشن) جي عمل کي تيز ڪيو وڃي.
گهرو وزارت سڀني ڊپٽي ڪمشنرن، پوليس ۽ قانون لاڳو ڪندڙ ادارن کي ضروري هدايتون جاري ڪرڻ جو پڻ حڪم ڏنو آهي ته جيئن حڪومتي فيصلن تي سختي سان عملدرآمد کي يقيني بڻايو وڃي.
خط ۾ هدايت ڪئي وئي آهي ته 11 جولاءِ کان هر روز گهرو وزارت کي رپورٽ موڪلي وڃي، جنهن ۾ بغير ويزا گرفتار ڪيل افغان شهرين جو انگ، انهن خلاف ڪيل ڪارروائي ۽ سندن موجوده قانوني حيثيت بابت مڪمل تفصيل شامل هجن.
وفاقي گهرو وزارت زور ڀريو آهي ته جاري ڪيل هدايتن ۽ فيصلن تي مڪمل ۽ سختي سان عملدرآمد کي يقيني بڻايو وڃي.
