الیکشن کمیشن نے 5 اپریل 2026 کو انتخابات کرانے کا فیصلہ برقرار رکھا۔
الیکشن کمیشن آف پاکستان نے بلوچستان حکومت کی جانب سے قومی اسمبلی کے حلقہ این اے 256 خضدار میں ضمنی انتخابات کی تاریخ میں توسیع کی درخواست مسترد کر دی ہے۔ صوبائی حکومت نے امن و امان کی صورتحال کو جواز بنا کر الیکشن ملتوی کرنے کی سفارش کی تھی۔
ذرائع کے مطابق الیکشن کمیشن نے موقف اختیار کیا کہ انتخابات اپنے مقررہ شیڈول کے مطابق ہی منعقد ہوں گے۔ اس طرح این اے 256 خضدار میں ضمنی انتخاب 5 اپریل 2026 کو ہی ہوگا۔
یہ نشست اختر مینگل کے قومی اسمبلی سے استعفے کے بعد خالی ہوئی تھی، جس کے باعث اس حلقے میں ضمنی انتخاب ضروری قرار پایا۔
الیکشن کمیشن کے ذرائع کا کہنا ہے کہ آئینی تقاضوں کو مدنظر رکھتے ہوئے بروقت انتخابات کا انعقاد ضروری ہے، جبکہ سیکیورٹی کے معاملات کو یقینی بنانے کے لیے متعلقہ اداروں کو ہدایات جاری کی جا سکتی ہیں۔
یاد رہے کہ این اے 256 خضدار کا ضمنی الیکشن سیاسی طور پر اہم سمجھا جا رہا ہے، اور اس میں مختلف جماعتوں کے درمیان مقابلہ متوقع ہے۔
