واشنگٹن: سابق امریکی صدر ڈونلڈ ٹرمپ نے گزشتہ رات غیر معمولی طور پر سوشل میڈیا پر مسلسل سرگرمی دکھائی، جہاں انہوں نے رات 9 بجے سے صبح 4 بجے تک مختلف نوعیت کی متعدد پوسٹس شیئر کیں۔
میڈیا رپورٹس کے مطابق ٹرمپ نے اس دوران اوسطاً ہر گھنٹے ایک نئی پوسٹ شیئر کی، جن میں سیاسی بیانات، تصاویر اور مختلف موضوعات شامل تھے۔ رات 9 بجے کی اپنی پہلی پوسٹ میں انہوں نے پوپ لیو کو امریکی خارجہ پالیسی کے لیے نقصان دہ قرار دیتے ہوئے تنقید کا نشانہ بنایا۔
اس کے کچھ ہی دیر بعد ٹرمپ نے اپنی ایک اے آئی سے تیار کردہ تصویر شیئر کی، جس میں انہیں “یسوع مسیح” سے مشابہ دکھایا گیا تھا۔ اس تصویر کو امریکا میں شدید تنقید کا سامنا کرنا پڑا اور سوشل میڈیا صارفین نے اسے نامناسب قرار دیا۔
مزید برآں، ٹرمپ نے چاند پر “ٹرمپ ٹاور” کی ایک تصویر بغیر کسی وضاحت کے شیئر کی، جس نے صارفین کو حیران کر دیا۔ رات ساڑھے بارہ بجے انہوں نے ایک بیان میں ایرانی بندرگاہوں کی آمدورفت روکنے سے متعلق بات کی، جسے بعض حلقوں نے حساس قرار دیا۔
بعد ازاں رات ڈھائی بجے انہوں نے صدر جو بائیڈن اور ان کے بیٹے ہنٹر بائیڈن سے متعلق ایک مضمون شیئر کیا، جسے دو منٹ بعد دوبارہ پوسٹ کیا گیا۔ اس کے علاوہ انہوں نے بال روم سے متعلق ایک پوسٹ بھی شیئر کی۔
صبح 4 بج کر 10 منٹ پر ٹرمپ نے آبنائے ہرمز کی ممکنہ بندش سے متعلق ایرانی خبر پر بھی تبصرہ کیا۔ ان پوسٹس کے علاوہ بھی وہ رات بھر مختلف مضامین اور معلومات شیئر کرتے رہے۔
تجزیہ کاروں کے مطابق ٹرمپ کی یہ مسلسل سوشل میڈیا سرگرمی غیر معمولی ہے اور اس نے ایک بار پھر ان کے طرزِ بیان اور آن لائن موجودگی پر بحث چھیڑ دی ہے۔
