اسلام آباد میں وزیراعظم شہباز شریف کی زیر صدارت وفاقی کابینہ کا اہم اجلاس منعقد ہوا جس میں ملک کی سیاسی، معاشی اور سکیورٹی صورتحال کا تفصیلی جائزہ لیا گیا۔ اجلاس کے دوران وزیراعظم نے کابینہ اراکین کو ایران اور امریکا کے درمیان جاری مذاکرات میں پاکستان کے کردار اور پیشرفت سے آگاہ کیا۔
ذرائع کے مطابق وزیراعظم نے کہا کہ پاکستان نے ایران اور امریکا کو کئی دہائیوں بعد ایک میز پر بٹھانے میں اہم کردار ادا کیا ہے، جو ایک بڑی سفارتی کامیابی ہے۔ ان کا کہنا تھا کہ دونوں ممالک کے درمیان مثبت پیشرفت کی امید ہے اور پاکستان اس عمل کو کامیاب بنانے کیلئے اپنی کوششیں جاری رکھے گا۔
وفاقی کابینہ کے اراکین نے ایران امریکا مذاکرات کے انعقاد کیلئے وزیراعظم کی کاوشوں کو سراہا اور نائب وزیراعظم و وزیر خارجہ اسحاق ڈار سمیت دیگر متعلقہ حکام کی کوششوں کی بھی تعریف کی۔ وزیراعظم نے فیلڈ مارشل عاصم منیر اور ان کی ٹیم کی خدمات کو بھی خراج تحسین پیش کیا اور کہا کہ انہوں نے شبانہ روز محنت کرکے اس عمل کو ممکن بنایا۔
وزیراعظم شہباز شریف نے اپنے خطاب میں کہا کہ پاکستان خطے میں پائیدار امن کے قیام کیلئے پرعزم ہے اور اس سلسلے میں ہر ممکن کردار ادا کرتا رہے گا۔ انہوں نے کہا کہ ایران اور امریکا کے درمیان 47 سال بعد اعلیٰ سطح پر براہ راست بات چیت ہوئی، جو ایک اہم پیشرفت ہے۔
ان کا مزید کہنا تھا کہ پاکستان کی سفارتی کوششوں کے نتیجے میں دونوں ممالک کے درمیان 21 گھنٹے طویل مذاکرات ہوئے اور وفود نے مثبت ماحول میں بات چیت کی۔ وزیراعظم نے کہا کہ عالمی سطح پر پاکستان کے کردار کو سراہا جا رہا ہے اور یہ ملک کیلئے ایک بڑا اعزاز ہے۔
وزیراعظم نے اس امید کا اظہار کیا کہ یہ مذاکرات خطے میں امن اور استحکام کے قیام میں مددگار ثابت ہوں گے اور پاکستان آئندہ بھی ایسے مثبت اقدامات میں اپنا کردار ادا کرتا رہے گا۔
