پاکستان کے سینئر اداکار علی طاہر نے کہا ہے کہ دوسری شادی صرف ایک سادہ فیصلہ نہیں بلکہ ایک نہایت حساس معاملہ ہے، جو مرد کی زندگی کو بھی پیچیدگیوں میں ڈال سکتا ہے۔
ایک نجی ٹی وی چینل کے مارننگ شو میں گفتگو کرتے ہوئے انہوں نے کہا کہ ہم اکثر بنیادی باتوں کو نظر انداز کر دیتے ہیں، حالانکہ اسلام میں چار شادیوں کا ذکر مخصوص حالات اور شرائط کے ساتھ آیا ہے، جن میں انصاف اور برابری جیسے اصولوں پر سختی سے عمل کرنا ضروری ہے، جو عملی زندگی میں آسان نہیں ہوتا۔
علی طاہر نے کہا کہ دوسری شادی اس وقت ہی قابلِ فہم ہو سکتی ہے جب یہ مکمل رضا مندی اور باہمی اتفاق سے ہو، چاہے وہ دونوں بیویوں کی ہو یا شوہر کی۔ ان کے مطابق اگر ایسا نہ ہو تو پھر علیحدگی ایک بہتر راستہ بن سکتی ہے۔
انہوں نے مزید کہا کہ عام تاثر کے برعکس دوسری شادی صرف خواتین کے لیے ہی نہیں بلکہ مرد کے لیے بھی ذہنی اور عملی طور پر مشکلات پیدا کر سکتی ہے۔ ان کے مطابق یہ فیصلہ اکثر اتنا آسان نہیں ہوتا جتنا سمجھا جاتا ہے، بلکہ اس کے نتیجے میں تعلقات اور ذمہ داریاں مزید پیچیدہ ہو جاتی ہیں۔
