پاکستان کے اسٹار بیٹر بابر اعظم نے پاکستان سپر لیگ (پی ایس ایل) میں ایک اور تاریخی سنگ میل عبور کرتے ہوئے 4 ہزار رنز مکمل کر لیے ہیں۔ وہ پی ایس ایل کی تاریخ میں یہ اعزاز حاصل کرنے والے پہلے بیٹر بن گئے ہیں۔
تفصیلات کے مطابق ہفتے کے روز پی ایس ایل الیون میں لاہور قلندرز کے خلاف میچ کے دوران پشاور زلمی کے کپتان بابر اعظم نے یہ کارنامہ انجام دیا۔ اس کے ساتھ ہی انہوں نے ٹی ٹوئنٹی کرکٹ میں سب سے زیادہ شراکتوں (پارٹنرشپس) کا ریکارڈ بھی برابر کر لیا۔
بابر اعظم نے اپنی پی ایس ایل کیریئر میں مختلف ٹیموں کی نمائندگی کی ہے جن میں اسلام آباد یونائیٹڈ، کراچی کنگز اور موجودہ ٹیم پشاور زلمی شامل ہیں۔ تینوں ٹیموں کے ساتھ شاندار کارکردگی نے انہیں لیگ کے کامیاب ترین بیٹرز میں شامل کر دیا ہے۔
یہ سنگ میل ان کی مستقل مزاجی اور اعلیٰ کارکردگی کا ثبوت ہے، جس نے انہیں نہ صرف پاکستان بلکہ عالمی ٹی ٹوئنٹی کرکٹ میں بھی نمایاں مقام دلایا ہے۔
