کراچی: سندھ کے سینیئر وزیر شرجیل انعام میمن نے الزام عائد کیا ہے کہ وزیراعلیٰ پختونخوا سہیل آفریدی کے دورۂ کراچی میں 9 مئی جیسے واقعات کو دُہرانے کی کوشش کی گئی۔
سینیئر وزیر شرجیل انعام میمن نے پریس کانفرنس کرتے ہوئے کہا کہ وزیراعلیٰ کے پی کے دورے سے قبل سکیورٹی تھریٹ موجود تھا، جس سے انہیں آگاہ کیا گیا تھا، جبکہ سکیورٹی پلان بھی ترتیب دیا گیا۔
انہوں نے کہا کہ طے شدہ روٹس اور مقامات کے برعکس دورے کیے گئے، اس موقع پر پولیس پر پتھراؤ، میڈیا کی گاڑیوں کو نقصان اور صحافیوں سے بدسلوکی کے واقعات پیش آئے۔
شرجیل میمن نے کہا کہ سکیورٹی صورتحال کا ناجائز فائدہ اٹھاتے ہوئے بدنظمی پیدا کی گئی اور 9 مئی جیسی صورتحال پیدا کرنے کی کوشش کی گئی ، اس صورتحال کے باوجود حکومتِ سندھ نے تحمل کا مظاہرہ کیا اور کسی رہنما کے خلاف ایف آئی آر درج نہیں کی۔
سندھ کے سینیئر وزیر شرجیل میمن نے وزیر اعلیٰ پختونخوا کو تنقید کا نشانہ بناتے ہوئے کہا کہ آپ نے الزام عائد کیا کہ حکومت سندھ نے آپ کو روکا ، آپ کو ٹریفک میں روک کر سندھ حکومت کو کیا فائدہ ہوا؟
شرجیل میمن نے مزید کہا کہ ہماری شرافت کا ناجائز فائدہ اٹھایا گیا ، سہیل آفریدی کو جو عزت دی گئی تھی ، انہوں نے اس کی لاج نہیں رکھی۔
