سکھر الیکٹرک پاور کمپنی (سیپکو) نے صارفین کو بہتر سہولیات فراہم کرنے کے سلسلے میں لاڑکانہ میں جدید کسٹمر سروس سینٹر قائم کر دیا،

سکھر (بیورورپورٹ)سکھر الیکٹرک پاور کمپنی (سیپکو) نے صارفین کو بہتر سہولیات فراہم کرنے کے سلسلے میں لاڑکانہ میں جدید کسٹمر سروس سینٹر قائم کر دیا، جس کا باقاعدہ افتتاح سیپکو کے چیف ایگزیکٹو آفیسر اعجاز احمد چنہ نے کیا۔افتتاحی تقریب میں سپرنٹنڈنگ انجینئر لاڑکانہ مشتاق بڑدی، واپڈا ہائیڈرو یونین کے ریجنل چیئرمین نثار احمد شیخ سمیت سیپکو کے اعلیٰ افسران اور یونین رہنما موجود تھے۔اس موقع پر تقریب سے خطاب کرتے ہوئے سی ای او اعجاز احمد چنہ نے کہا کہ جدید کسٹمر سروس سینٹر کا قیام صارفین کو فوری اور معیاری سہولیات فراہم کرنے کی جانب ایک اہم قدم ہے۔ انہوں نے بتایا کہ حکومتِ پاکستان کی ہدایات کے مطابق فری ہیلپ لائن 118 کو بھی فعال کر دیا گیا ہے، جس کے ذریعے صارفین اپنی شکایات درج کرا سکتے ہیں اور ان پر ہونے والی پیش رفت سے آگاہی حاصل کر سکتے ہیں۔اعجاز احمد چنہ نے مزید بتایا کہ سیپکو انتظامیہ کی مربوط، مؤثر اور عملی حکمتِ عملی کے باعث گزشتہ چھ ماہ کے دوران ادارے کو 30 ارب روپے کے بھاری نقصان سے بچایا گیا ہے۔ انہوں نے کہا کہ گزشتہ چودہ ماہ کی مسلسل محنت کے نتیجے میں ادارے کی ریکوری میں 70 فیصد اضافہ ہوا ہے جبکہ لائن لاسز میں 3 فیصد کمی ریکارڈ کی گئی ہے۔
انہوں نے واضح کیا کہ بجلی چوری کے خلاف زیرو ٹالرنس پالیسی پر سختی سے عملدرآمد جاری ہے اور اب تک ساڑھے تین ہزار سے زائد غیر قانونی کنکشن منقطع کیے جا چکے ہیں۔ اس موقع پر انہوں نے دادو میں بھی جلد جدید کسٹمر سروس سینٹر قائم کرنے کا اعلان کیا۔افتتاحی تقریب کے موقع پر سیپکو کے افسران اور یونین رہنماؤں نے سی ای او اعجاز احمد چنہ کی لاڑکانہ آمد پر شاندار استقبال کیا۔