سکھر: مدرسہ منزل گاہ میں عظیم الشان دستارِ فضیلت کانفرنس منعقد ہوگی، مولانا فضل الرحمان خصوصی خطاب کریں گے

سکھر جمعیت علماء اسلام کے مرکزی ناظم مفتی امیر مولانا سعود افضل ہالجوی نے سکھر پریس کلب میں پریس کانفرنس کرتے ہوئے اعلان کیا ہے کہ جمعیت علماء اسلام کے زیرِ انتظام تاریخی مدرسہ منزل گاہ سکھر میں ایک عظیم الشان دستارِ فضیلت کانفرنس کا انعقاد کیا جا رہا ہے، جس میں جمعیت علماء اسلام کے قائد مولانا فضل الرحمان خصوصی خطاب کریں گے۔پریس کانفرنس سے خطاب کرتے ہوئے مفتی امیر مولانا سعود افضل ہالجوی نے بتایا کہ مدرسہ منزل گاہ سکھر گزشتہ 87 برسوں سے دینی خدمات سرانجام دے رہا ہے، جہاں سے ہزاروں علماء کرام فارغ التحصیل ہو چکے ہیں جو پاکستان سمیت دنیا کے مختلف ممالک میں اسلام کی تعلیمات کو عام کرنے میں مصروف ہیں۔انہوں نے بتایا کہ اس عظیم الشان دستارِ فضیلت کانفرنس میں جمعیت علماء اسلام کے مرکزی سیکریٹری جنرل مولانا عبدالغفور حیدری، سندھ کے جنرل سیکریٹری مولانا راشد محمود سومرو اور سابق وفاقی وزیر مولانا اسد محمود بھی خصوصی خطاب کریں گے۔مفتی امیر مولانا سعود افضل ہالجوی کے مطابق کانفرنس کے دوران 54 علماء کرام، 20 مفتیانِ کرام، 6 حفاظِ قرآن اور 10 حافظات کی دستاربندی کی جائے گی، جو دینی تعلیم کے میدان میں ایک اہم سنگِ میل ثابت ہوگی۔
انہوں نے سکھر اور سندھ بھر کے عوام، علماء کرام، طلبہ اور دینی حلقوں سے اپیل کی کہ وہ اس بابرکت اور روحانی اجتماع میں بھرپور شرکت کر کے کامیاب بنائیں۔پریس کانفرنس کے اختتام پر صحافیوں کے مختلف سوالات کے جوابات بھی دیے گئے۔