تاجر سپریم کونسل کے وفد کی اے ایس پی سٹی سکھر سے ملاقات، امن و امان اور سیکیورٹی امور پر تبادلۂ خیال

سکھر تاجر سپریم کونسل کے صدر حاجی محمد شفیع عباسی کی قیادت میں تاجروں کے ایک وفد نے اے ایس پی سٹی سکھر کیپٹن صہیب سے ان کے دفتر میں ملاقات کی۔ ملاقات کے دوران شہر کی مجموعی امن و امان کی صورتحال، تجارتی و کاروباری مراکز میں سیکیورٹی انتظامات، چوکیداروں کو شناختی کارڈ کے اجرا، پولیس گشت میں اضافے سمیت دیگر اہم امور پر تفصیلی تبادلۂ خیال کیا گیا۔تاجروں کے وفد نے اے ایس پی کو آگاہ کیا کہ شہر میں بڑھتی ہوئی تجارتی سرگرمیوں کے باعث بازاروں اور کاروباری مراکز میں سیکیورٹی کو مزید مؤثر بنانے کی اشد ضرورت ہے۔ وفد نے مطالبہ کیا کہ تمام چوکیداروں کو باقاعدہ شناختی کارڈ جاری کیے جائیں جبکہ حساس علاقوں میں پولیس گشت میں اضافہ کیا جائے تاکہ تاجروں اور شہریوں کو تحفظ کا احساس مل سکے۔اس موقع پر اے ایس پی سٹی کیپٹن صہیب نے تاجروں کو یقین دلایا کہ پولیس شہر میں امن و امان کے قیام کے لیے ہر ممکن اقدامات کر رہی ہے اور تاجروں کو درپیش مسائل کو ترجیحی بنیادوں پر حل کیا جائے گا۔ انہوں نے کہا کہ پولیس اور تاجر برادری کے باہمی تعاون سے جرائم پر قابو پانا ممکن ہے اور اس سلسلے میں مشترکہ کوششیں ناگزیر ہیں۔ملاقات میں تاجر سپریم کونسل کے جنرل سیکرٹری ممتاز لکی کے علاوہ برکت سولنگی، عبدالغفار میمن، نوید آرائیں، مجیب آخوند، ملنگ بابا، آصف میمن، صادق کلوڑ، محمد فیصل میمن، ظہیر بھٹی، شہباز ملک، عبدالرشید (غریب آباد)، عمران بندھانی، عبدالرحیم سیٹھی اور امجد بھی شریک تھے۔