کیلیفورنیا: ویڈیو شیئرنگ پلیٹ فارم یوٹیوب نے اپنے مختصر ویڈیو پلیٹ فارم یوٹیوب شارٹس کے لیے متعدد نئے فیچرز متعارف کرانے کا اعلان کیا ہے، جن کا مقصد صارفین کو تصاویر پر مبنی مواد تخلیق کرنے اور شارٹس فیڈ میں مزید آسان اور دلچسپ انداز میں شیئر کرنے کی سہولت فراہم کرنا ہے۔
رپورٹس کے مطابق یوٹیوب شارٹس کو بتدریج انسٹاگرام اور ٹک ٹاک جیسی خصوصیات سے آراستہ کیا جا رہا ہے تاکہ صارفین کو مختصر ویڈیوز کے ساتھ ساتھ تصویری مواد شیئر کرنے کے بھی زیادہ مواقع فراہم کیے جا سکیں۔
نئے فیچرز کے تحت صارفین اب زیادہ سے زیادہ 10 تصاویر پر مشتمل سلائیڈ شو طرز کی پوسٹس تیار کر سکیں گے۔ اس کے علاوہ ہر تصویر پر اپنی پسند کا متن (ٹیکسٹ) بھی شامل کیا جا سکے گا، جبکہ پوسٹ کے ساتھ 15 سیکنڈ تک کا پس منظر موسیقی بھی لگائی جا سکے گی۔
کمپنی کا کہنا ہے کہ ان تبدیلیوں کے بعد صارفین کو ہر بار مکمل ویڈیو ایڈٹ کرنے کی ضرورت نہیں ہوگی، بلکہ وہ صرف تصاویر کی مدد سے بھی پرکشش اور تخلیقی شارٹس تیار کرکے اپنے ناظرین کو باآسانی متوجہ کر سکیں گے۔
یوٹیوب کے مطابق ان نئے فیچرز کا بنیادی مقصد صارفین کو اپنی تصویری کہانیاں اور یادگار لمحات براہ راست شارٹس فیڈ میں شیئر کرنے کا آسان طریقہ فراہم کرنا ہے۔ یہ فیچر خاص طور پر ان صارفین کے لیے مفید ہوگا جو ویڈیو بنانے کے بجائے تصاویر کے ذریعے اپنی بات پہنچانا چاہتے ہیں۔
ماہرین کے مطابق تصاویر پر مبنی نئی پوسٹس کافی حد تک انسٹاگرام اور ٹک ٹاک کے فیچرز سے مشابہ ہوں گی، جہاں اس نوعیت کا مواد پہلے ہی صارفین میں کافی مقبول ہے۔
اس سے قبل یوٹیوب نے شارٹس کے انٹرفیس میں بھی کئی اہم تبدیلیوں کا اعلان کیا تھا۔ ان میں کلیئر اسکرین موڈ بھی شامل ہے، جس کے ذریعے ویڈیو دیکھتے وقت اسکرین پر موجود آئیکونز اور متن عارضی طور پر غائب ہو جائیں گے، تاکہ صارفین بغیر کسی خلل کے ویڈیو سے لطف اندوز ہو سکیں۔
اسی طرح صارفین کو اب شارٹس ویڈیوز کی پلے بیک اسپیڈ دوگنی (2x) کرنے کی سہولت بھی فراہم کی جا رہی ہے، جس کے ذریعے وہ مختصر ویڈیوز کو مزید تیزی سے دیکھ سکیں گے۔
یوٹیوب نے صارفین کے ردعمل سے متعلق نظام میں بھی تبدیلی کا اعلان کیا ہے۔ کمپنی تھمز اپ کے بجائے ہارٹ آئیکون متعارف کرا رہی ہے، جو لائیک بٹن کے طور پر کام کرے گا۔
مزید برآں، ڈس لائیک بٹن کو مرحلہ وار ختم کیا جا رہا ہے، جبکہ اس کی جگہ “ناٹ انٹرسٹڈ” اور “ڈونٹ ریکمینڈ دس چینل” جیسے اختیارات فراہم کیے جائیں گے، تاکہ صارفین اپنی پسند اور دلچسپی کے مطابق مواد کو بہتر انداز میں کنٹرول کر سکیں۔
یوٹیوب کا کہنا ہے کہ ان تمام نئی تبدیلیوں کا مقصد شارٹس کو مزید جدید، صارف دوست اور تخلیقی بنانا ہے تاکہ تخلیق کاروں اور ناظرین دونوں کو بہتر تجربہ فراہم کیا جا سکے۔
