سکھر (رپورٹ): پاکستان ریلوے ڈرائیورز ایسوسی ایشن لاہور کے زیر اہتمام پاکستان ریلوے پریم یونین کے عہدیداروں کے اعزاز میں شاندار استقبالیہ تقریب کا انعقاد کیا گیا، جس میں ملک بھر سے سینکڑوں ڈرائیورز اور ریلوے ملازمین نے شرکت کرتے ہوئے پریم یونین میں شمولیت کا اعلان کیا۔
تقریب سے خطاب کرتے ہوئے پریم یونین کے مرکزی سیکرٹری جنرل خیر محمد تونیو اور دیگر رہنماؤں نے نئے شامل ہونے والے ڈرائیورز اور ملازمین کو خوش آمدید کہتے ہوئے کہا کہ پریم یونین ہر فورم پر ریلوے ملازمین اور مزدور برادری کے حقوق کی مؤثر آواز بنے گی۔ انہوں نے کہا کہ ملازمین کی اپ گریڈیشن کے لیے بھرپور جدوجہد جاری رکھی جائے گی اور عدالتِ عالیہ کے فیصلوں پر مکمل عملدرآمد کو یقینی بنایا جائے گا۔
انہوں نے کہا کہ ٹرینوں، ریلوے اسکولوں اور اسپتالوں کو آؤٹ سورس کرنا اور کنٹریکٹ بنیادوں پر بھرتیاں کرنا دراصل نجکاری کے مترادف ہے، جس کی پریم یونین بھرپور مخالفت کرتی ہے۔ ان کا مطالبہ تھا کہ کنٹریکٹ پر کام کرنے والے تمام ریلوے ملازمین کو مستقل کیا جائے اور آئندہ کنٹریکٹ بنیادوں پر بھرتیوں کا سلسلہ ختم کیا جائے۔
خیر محمد تونیو نے کہا کہ ملازمین کے تمام مسائل متعلقہ حکام کے سامنے بھرپور انداز میں اٹھائے جائیں گے تاکہ ریلوے کارکنوں کو ان کے جائز حقوق مل سکیں۔ انہوں نے اس عزم کا اظہار کیا کہ ادارے، ملازمین کے حقوق اور روزگار کے تحفظ کے لیے ہر قانونی، آئینی اور جمہوری جدوجہد جاری رکھی جائے گی۔
انہوں نے حکومت سے مطالبہ کیا کہ تمام TLA ملازمین کو فوری طور پر مستقل کیا جائے، مقامی افراد کو روزگار میں ترجیح دی جائے، ریلوے ملازمین کے حقوق کا مکمل تحفظ یقینی بنایا جائے، ریلوے کو جدید سہولیات اور وسائل فراہم کیے جائیں، خالی آسامیوں پر فوری اور شفاف بھرتیاں کی جائیں، جبکہ پنشنرز اور ملازمین کے تمام واجبات بھی فوری ادا کیے جائیں۔
انہوں نے مزید کہا کہ پاکستان ریلوے پریم یونین ہمیشہ مزدوروں کی مضبوط آواز رہی ہے اور ریلوے کی نجکاری کے ہر فیصلے کے خلاف بھرپور احتجاج اور جدوجہد جاری رکھی جائے گی۔
