ماسکو: روسی خبر رساں ایجنسی ریا نووستی نے دعویٰ کیا ہے کہ اردن میں قائم امریکی فوجی اڈہ حالیہ ایران جنگ کے آخری مراحل میں ایران کے خلاف امریکی کارروائیوں کے لیے ایک اہم علاقائی مرکز کے طور پر استعمال کیا گیا۔
روسی خبر رساں ایجنسی نے باخبر ذرائع کے حوالے سے رپورٹ کیا کہ اردن میں واقع موفق السلطی ایئربیس جنگ کے اختتامی مرحلے کے دوران مرکزی کردار ادا کرتی رہی۔
ذرائع کے مطابق، 60 روزہ جنگ کے آخری مراحل میں یہی اڈہ ایران کے خلاف امریکی فوجی کارروائیوں کے لیے ایک اہم آپریشنل مرکز کے طور پر استعمال ہوا۔
رپورٹ میں مزید دعویٰ کیا گیا ہے کہ امریکا نے اس اڈے پر اس لیے زیادہ انحصار کیا کیونکہ خطے میں اس کے لیے متبادل آپریشنل مراکز محدود تھے۔
ذرائع نے یہ بھی دعویٰ کیا کہ خلیجی خطے میں امریکا کے قریبی اتحادی سعودی عرب اور متحدہ عرب امارات نے امریکی طیاروں کو اپنی فضائی حدود استعمال کرنے کی اجازت نہیں دی، جس کے باعث اردن کے فوجی اڈے کی اہمیت مزید بڑھ گئی۔
نوٹ: یہ معلومات روسی خبر رساں ایجنسی ریا نووستی اور اس کے ذرائع کے دعوؤں پر مبنی ہیں۔ امریکا، اردن، سعودی عرب یا متحدہ عرب امارات کی جانب سے ان دعوؤں کی باضابطہ تصدیق یا تردید سامنے نہیں آئی۔
