اسلام آباد: آن لائن حج پورٹل نے ڈیڑھ لاکھ رجسٹریشن کا اہم سنگ میل عبور کر لیا ہے، جبکہ حکومت نے حج کے تمام مراحل کو مکمل طور پر ڈیجیٹل بنانے کا اعلان کیا ہے۔
وزارت مذہبی امور کے مطابق وزیراعظم کی ہدایت پر حج واجبات کی آن لائن ادائیگی کا نظام بھی تیار کر لیا گیا ہے، جس کے تحت عازمین ون لنک کے ذریعے گھر بیٹھے حج واجبات آسانی سے جمع کرا سکیں گے۔
وزارت کے ترجمان نے بتایا کہ رجسٹریشن سے لے کر ادائیگی تک پورا حج نظام ڈیجیٹل ہوگا، جس سے عازمین کو سہولت، شفافیت اور تیز رفتار خدمات فراہم کی جائیں گی۔
ترجمان کے مطابق نئے نظام کے تحت بیرونِ ملک مقیم پاکستانی بھی دنیا کے کسی بھی حصے سے آن لائن حج رجسٹریشن کر سکیں گے اور اپنے حج واجبات کی ادائیگی بھی گھر بیٹھے مکمل کر سکیں گے۔
وزارت مذہبی امور کا کہنا ہے کہ جدید ڈیجیٹل نظام متعارف کرانے کا مقصد حج درخواستوں، ادائیگیوں اور دیگر مراحل کو مزید آسان، محفوظ اور مؤثر بنانا ہے، تاکہ عازمین کو غیر ضروری مشکلات کا سامنا نہ کرنا پڑے۔
