ہنگو: خیبرپختونخوا کے ضلع ہنگو میں انسداد پولیو مہم کے دوران سکیورٹی پر مامور پولیس اہلکاروں پر فائرنگ کا افسوسناک واقعہ پیش آیا، جس کے نتیجے میں ایک اہلکار شہید جبکہ چار دیگر زخمی ہو گئے۔
پولیس کے مطابق یہ واقعہ ہنگو کے علاقے چھپری وزیران میں پیش آیا جہاں پولیو ٹیم کی حفاظت پر تعینات پولیس وین کو نامعلوم افراد نے نشانہ بنایا۔ حملے کے بعد علاقے میں خوف و ہراس پھیل گیا جبکہ سکیورٹی فورسز نے فوری طور پر علاقے کو گھیرے میں لے کر سرچ آپریشن شروع کر دیا۔
ایس ڈی پی او مجاہد حسین کے مطابق فائرنگ کے نتیجے میں پانچ اہلکار زخمی ہوئے تھے جنہیں فوری طور پر قریبی اسپتال منتقل کیا گیا۔ تاہم زخمیوں میں سے ایک اہلکار زخموں کی تاب نہ لاتے ہوئے شہید ہو گیا، جبکہ دیگر اہلکار زیر علاج ہیں۔
پولیس حکام کا کہنا ہے کہ حملہ آوروں کی تلاش جاری ہے اور واقعے میں ملوث عناصر کو جلد گرفتار کر لیا جائے گا۔ اس کے ساتھ ہی پولیو ٹیموں کی سکیورٹی مزید سخت کرنے کی ہدایات بھی جاری کر دی گئی ہیں تاکہ آئندہ ایسے واقعات سے بچا جا سکے۔
واضح رہے کہ پاکستان میں پولیو کے خاتمے کیلئے جاری مہم کے دوران سکیورٹی اہلکاروں اور طبی ٹیموں کو ماضی میں بھی حملوں کا سامنا رہا ہے، تاہم حکومت اس موذی مرض کے خاتمے کیلئے پرعزم ہے۔
