سکھر شہر میں ناجائز تجاوزات کے خاتمے، ٹریفک کی روانی کی بہتری اور شہری سہولتوں کو یقینی بنانے کے سلسلے میں میونسپل کمشنر سکھر پیر واحد بخش کی زیر صدارت آج مختلف محکموں کے عملے کے ساتھ میٹنگ منعقد ہوئی۔

سکھر شہر میں ناجائز تجاوزات کے خاتمے، ٹریفک کی روانی کی بہتری اور شہری سہولتوں کو یقینی بنانے کے سلسلے میں میونسپل کمشنر سکھر پیر واحد بخش کی زیر صدارت آج مختلف محکموں کے عملے کے ساتھ میٹنگ منعقد ہوئی۔ میٹنگ میں ایڈوائزر ٹو میئر سکھر عابد علی انصاری، او ایس اسلام الدین شیخ، ڈائریکٹر ٹیکسز اعجاز انڑ اور دیگر متعلقہ افسران و اسٹاف بھی موجود تھا۔ میٹنگ میں شہر میں قائم ناجائز تجاوزات کے خاتمے اور ٹریفک نظم و ضبط کو بہتر بنانے کے حوالے سے تفصیلی غور و خوض کیا گیا اور میونسپل کمشنر کی جانب سے عملے کو واضح اور ضروری ہدایات جاری کی گئیں۔ میونسپل کمشنر نے زور دیا کہ شہری سہولت اور شہر کے مجموعی نظم کو برقرار رکھنے کے لیے تجاوزات کے خلاف کارروائیاں بلا امتیاز اور تسلسل کے ساتھ جاری رکھی جائیں گی۔ میٹنگ کے بعد میونسپل کمشنر پیر واحد بخش کی سربراہی میں، اینٹی انکروچمنٹ آفیسر بلاول کورائی کی زیر نگرانی شہر کے مختلف علاقوں سٹی پوائنٹ، قاسم پارک، کوئنس روڈ، پریس کلب روڈ، مینارہ روڈ سمیت دیگر علاقوں میں کارروائی کی گئی۔ اس دوران ہوٹلوں اور دکانوں کے باہر غیر قانونی طور پر رکھا گیا سامان ضبط کیا گیا جبکہ قواعد و ضوابط کی خلاف ورزی پر متعدد دکانداروں کے چالان بھی کیے گئے۔ کارروائی میں اینٹی انکروچمنٹ ڈپارٹمنٹ کے انسپکٹرز سہیل میمن، سہیل الطاف شیخ، جیئند شیخ، افضل چنہ سمیت دیگر عملہ شریک رہا۔ انتظامیہ کی جانب سے دکانداروں کو ہدایت کی گئی کہ وہ سڑکوں اور فٹ پاتھوں پر سامان رکھنے سے گریز کریں، بصورت دیگر سامان ضبط کے ساتھ چالان بھی عمل میں لایا جائے گا۔ میونسپل کمشنر نے واضح کیا کہ ناجائز تجاوزات کے خلاف یہ کارروائیاں مستقل بنیادوں پر جاری رہیں گی تاکہ شہریوں کو آمد و رفت میں سہولت فراہم کی جا سکے اور شہر کا مجموعی نظم بہتر بنایا جا سکے۔