سکھر میں پولیسنگ کا ایک اور اہم سنگِ میلSSP سکھر اظہر خان مغل نے نئے ASP/SDPO سٹی آفس کا افتتاح کر دیا

سکھر پولیس نے شہریوں کو بہتر اور مؤثر پولیسنگ کی فراہمی کی جانب ایک اور اہم قدم اٹھاتے ہوئے نئے قائم ہونے والے ASP/SDPO سٹی سکھر آفس کا باقاعدہ افتتاح کر دیا۔ افتتاحی تقریب میں SSP سکھر اظہر خان مغل نے فیتہ کاٹ کر آفس کا آغاز کیا۔ یہ منصوبہ محض دو ہفتوں کی قلیل مدت میں پایۂ تکمیل تک پہنچا، جو سکھر پولیس کی پیشہ ورانہ صلاحیتوں اور مؤثر قیادت کا واضح ثبوت ہے۔
اس منصوبے کی کامیاب تکمیل SSP سکھر اظہر خان مغل کی بھرپور نگرانی اور مضبوط انتظامی قیادت کا نتیجہ ہے، جبکہ عملی سطح پر اس آفس کی تعمیر، تنظیم اور فعال قیام کی ذمہ داری کیپٹن (ر) محمد صہیب امین، ASP سٹی سکھر نے نہایت محنت، نظم و ضبط اور پیشہ ورانہ انداز میں ادا کی۔نئے ASP/SDPO سٹی آفس کے قیام سے سکھر شہر میں پولیسنگ کے نظام کو مزید مؤثر بنانے،شہریوں کو فوری انصاف کی فراہمی، عوامی مسائل کے بروقت حل اور امن و امان کی مجموعی صورتحال کو بہتر بنانے میں نمایاں مدد ملے گی۔اس آفس کے ذریعے پولیس افسران کو انتظامی اور عملی امور انجام دینے میں سہولت میسر آئے گی، جس سے جرائم کی روک تھام اور عوامی شکایات کے ازالے میں تیزی آئے گی۔شہری حلقوں، سماجی شخصیات اور معززینِ شہر نے اس اقدام کو خوش آئند قرار دیتے ہوئے امید ظاہر کی ہے کہ نئے آفس کے قیام سے عوام اور پولیس کے درمیان اعتماد میں مزید اضافہ ہوگا اور پولیس کی کارکردگی میں بہتری آئے گی۔افتتاحی تقریب کے موقع پر موجود پولیس افسران اور جوانوں نے SSP سکھر اظہر خان مغل اور ASP سٹی کیپٹن (ر) محمد صہیب امین کی کاوشوں کو سراہتے ہوئے انہیں مبارکباد پیش کی اور اس عزم کا اظہار کیا کہ سکھر پولیس عوام کے جان و مال کے تحفظ اور امن و امان کے قیام کے لیے مزید مؤثر کردار ادا کرتی رہے گی۔