سکھر رینج: ڈاکوؤں کے خلاف آپریشن میں اہم کامیابی، پنجاب کے دو اغوا شدہ افراد بازیاب

ڈی آئی جی سکھر رینج کیپٹن (ر) فیصل عبداللہ چاچڑ کی سربراہی میں ڈاکوؤں کے خلاف جاری پانچ روزہ آپریشن میں ایک اور اہم کامیابی حاصل ہوئی ہے۔ سندھ اور پنجاب کے بارڈر علاقوں میں کیے گئے اس ٹارگٹڈ آپریشن کے دوران پنجاب کے رہائشی دو اغوا شدہ افراد ریاض اور عمر آرائیں باحفاظت بازیاب کروا لیے گئے ہیں۔
ذرائع کے مطابق 12 نومبر کو پنجاب کے علاقے سے تعلق رکھنے والے ریاض اور عمر آرائیں کو دھوکے سے بلا کر اغوا کیا گیا اور ملزمان نے ان سے تاوان طلب کیا تھا۔ تاہم، ڈی آئی جی سکھر رینج کی قیادت میں پولیس اور رینجرز کی مشترکہ کارروائی کے دوران دونوں مغوی ڈاکوؤں کے چنگل سے باحفاظت آزاد کروا دیے گئے۔اس کامیاب کارروائی میں ایس ایس پی گھوٹکی، ایس ایس پی کشمور، ڈی پی او راجن پور اور سندھ رینجرز کے اہلکاروں نے بھرپور تعاون فراہم کیا، جس کے نتیجے میں مغوی افراد کی حفاظت کو یقینی بنایا گیا۔ڈی آئی جی سکھر رینج کیپٹن (ر) فیصل عبداللہ چاچڑ نے کہا کہ جرائم پیشہ ڈاکوؤں کے گروہوں کے خلاف جاری آپریشن ان کے منطقی انجام تک جاری رہے گا اور قانون کے دائرے میں کسی بھی قسم کی دہشت گردی یا اغوا کی کارروائی کو کسی صورت برداشت نہیں کیا جائے گا۔
پولیس اور رینجرز نے شہریوں سے اپیل کی کہ وہ ایسے کسی بھی واقعے کی اطلاع فوری طور پر متعلقہ حکام کو دیں تاکہ بروقت اور مؤثر کارروائی کی جا سکے۔