تل ابیب: اسرائیل نے امریکا سے جدید F-35 اور F-15IA لڑاکا طیاروں کے مزید دو اسکواڈرن خریدنے کے منصوبے کی حتمی منظوری دے دی ہے۔
اسرائیلی وزارت دفاع کے مطابق اس معاہدے کی منظوری وزارتی کمیٹی برائے خریداری نے دی ہے، جو اسرائیلی فوج کو مزید مضبوط بنانے کے ایک بڑے منصوبے کا حصہ ہے۔ یہ منصوبہ مجموعی طور پر 350 ارب شیکل (تقریباً 119 ارب ڈالر) پر مشتمل دفاعی پروگرام کا ابتدائی مرحلہ ہے۔
اسرائیلی وزیراعظم بنیامین نیتن یاہو نے کہا ہے کہ اس توسیع شدہ دفاعی بجٹ کا بڑا حصہ ملک کے اندر ہی اسلحہ سازی اور دفاعی صنعت کو مضبوط بنانے پر خرچ کیا جائے گا، تاکہ بیرونی انحصار کم کیا جا سکے۔
انہوں نے مزید کہا کہ اسرائیل مستقبل میں خود بھی جدید جنگی طیاروں کی تیاری پر کام کرے گا اور اپنی دفاعی صلاحیتوں کو مزید بہتر بنائے گا۔
